الثلاثاء، مايو 08، 2012

لا تخاوي من على ابوه بَـدَّاك

لا تخاوي من على ابوه بَـدَّاك

لا تفرح إن الوقـت أسعدك واعطاك
لابــد مـا ســود اللـــــــيالي تبكيـــك


دنــــــيا تقـلـــب علــها مـــاتــولاك
تمسي عزيز وتصبح من الصعاليك


إلى اقبلت تخفي عيوبك عن اعداك
وإلى ادبرت تظهـر عيوبك لاهاليـك


اغنم من صروف الدهر كانه امداك
قبل اللحد عن ظاهر الارض يخفيك


وترى التشكي للمخـالـيـق يشــنـاك
يحـط من قـدرك و يفـرح امعـاديـك


وكـثر التـشره يجعـل الناس تجـفاك
ولا عــاد تلـقى بيـنهـم من يخـاويك


ولا تمادى في زعل من ترضــــاك
مادام جاء عاني على شأن يرضيك


ولا تخــاوي من على ابوه بـــــداك
هذاك وان طال الزمان يغدر فـيـــك


والـجـاهـل احـذر لاتجـادلـه يـبلاك
في كـلـمة بين الـمخاليـق تعـمـيــك


والهَرْجة العـوجَـا لـو أنه تنَصَّــاك
حـاول تجـاهـلهـا وخــله تـعـديـــك


ولاتخَـيِّـبْ هَـقْـوات اللي تَـهَـقْـواك
مادام جـاء بين المخاليق ناصيــك


واحـذر تَـهَـزَّا يـافتى بخَلْق مولاك
تـشـوفـها بأقـرب قـريـبٍ يوالـيـك


ولاتفرح بزودٍ على الحق وان جاك
زودِك ترى نقصٍ على حق ذوليـك


وخـل القناعه ميزةٍ من مزايــــاك
مـع الـقـنـاعـه كـل شـيٍ يـكْـفــيـــك


وان جَتْ لك الدنيا على غير مَشْهاك
اصبر تـرى بالـصَّـبر تدْرك امانـيـك


لا تأمـن الدنيـا تـرى الـوقـت فَـتَّـاك
لاجـا القـدر كثـر الحـذر ما ينَجِّـيــك

بركات الشريف

ليست هناك تعليقات: