الأحد، مارس 04، 2012

مساحة الحزن


مساحة الحزن


مساحة الـحـزن في صـدري تزيـد اتساع
أكـبر وتكـبر معي والـحـزن بئس الـرفيق

ولا عـاد يـحـصي نـوائـبـهـا مـداد اليراع
مهما بـغـيـت أكـتـب التعبير فكري يضيق

ثلثين من عـمـري الغالي يـطـري الـوداع
ويـلـوح لي ثالـث الثلثين وأتـلى الـطـريق

مِـبْـحِـر بـبـحـرٍ عقيدته التعـب والـصـراع
مـجـدافي الـنـيه الوضحى وجرحي عميق

ولا حـصّـل الـقـلـب غـيـر آمال ماتستطاع
تاخـذ مـن الـنـجـم بـعـد وتستعــير الـبريق

ويعــودني الـهـم لامِـنّـهْ قــفــرني وجـــاع
ويقلط على حدب صدري والشعور الرقيق

تـعـبـت مـن كــثـر مـاركـزت فـاالاسـتـماع
كــَثْـر الـصخـب والجـدل والثرثره والنعيق

وقــتٍ تـغــيـر وصـرنـا فـيه مـوقـف دفـاع
والـنـاس يـبـغـونـهـا عـوجـا وشعـلة حريق

وانـا بـعـد ماعـرفـت اشلـون بعـض الطباع
واصبح عـدوي أحَـن مـن الـلـزم والـصديق

مـلـيّـت مـن كل شي وصار عـنـدي اقـتـناع
إن الـرضـا بـالـقـدر لـبس الـنفـوس الانـيق

يـاواهــب الـصـبـر يـارب الـبـشـر والسباع
رحـمـاك لاتـحـمّـل الـمـخـلـوق مالا يطــيـق

وامـنـن عـلـيـه بحسن الصبر وافضل متاع
مـمـا يـاربي بـسلــطـــانـك وقـــدرك يـلـيـق

ولا ابيضّت العـين ومن الموت ذقـت النزاع
واحـتاروا الـخـلـق في وطـاح دمـع الشقيق

الـهـمـني احسن بـك النية وانا في انـقـطاع
والـهـمـني اوحِّــدك والـزم رشـاك الـوثـيـق

 عبدالرحمن المريبيط
(منقول من جريدة الرياض)